Musharax
C/raxmaan C/shakuur oo la kulmay Odayaasha iyo Maamulka Galgaduud
Musharaxa xilka madaxweynimo ee Soomaaliya Avv C/raxmaan
C/shakuur ayaa kulan la qaatay odayaasha iyo maamulka Gobolka
Galgaduud. Xaflad Afur oo si heer sare loo soo agaasimay ayaa
waxaa kasoo qaybgalay Gudoomiya Gobolka Galgaduud Mudane Axmed
Yuusuf Goobe, Cismaan Taar dhuleed godoomiya degmada Guriceel,
Mudane C/raxmaan Geedaqorow gudoomiya degmada Dhuusamareeb,
odayaal, siyaasiyiin, haween iyo aqoonyahan.
Kulanka oo uu musharaxu martigeliyey ayaa waxaa ka hadlay
odayaal iyo siyaasiyiin ay ka midyihiin ay ka midyihiin Gudoomiye
Abuukar Cusmaan Sheekh (Abuukar Ganeey), Caaqil Xasan Cilmi
Yaxye, Siyaasiga Xaashi Nuure Awdiini, Jeneraal Cali Xaashi
Baraale, Nabdoon Camalow iyo Xaliimo Ismaaciil (Xalimo Yareey,
Cirfe iyo Abuukar Suryare iyo xubno kale.
Dadka goobta ka hadlay ayaa hoosta kawada xariiqay sidii gacan
looga gaysan lahaa xoojinta iyo taageerida maamulka cusub
ee Gobolku yeeshay. Odayaasha iyo siyaasiyiinta kasoo qaybgalay
kulanka ayaa dhamaantood u mahadceliyey musharax kuna amaanay
sida uu isaga xilsaaray deeganka iyo dadkiisa iyo sida uu
mar walba ugu taaganyahay danaha dadka uu metelo, iyagoona
ku baaqay in musharaxa lala garab istaago taageero buuxda.
Musharax Avv. C/raxmaan C/shakuur oo ugu danbayntii meesha
ka hadlay ayaa sheegay inuu si wayn u danaynayo deeganka,
isagoo balanqaaday inuu marwalba ka shaqayn doono sidii deegaanka
iyo dadkiisaba loo hormarin lahaa, looguna xiri lahaa deegaanada
kale ee ay deegaan iyo bahwadaaga leeyihiin, si loo taabageliyo
maamul salbalaaran oo deegankaas ka ambaqaada. Musharaxu wuxuu
sheegay in sida keli ah ee taasi ku suuroobi kartaa ay tahay
in la helo dib u heshiisiin bulsho oo gole dhaqan lagu abuuro
lana dhiso maamul sharciyada leh oo loo dhanyahay.
Wuxuu ugu danbayntii ugu baaqay qurbajooga iyo ganacsatada
deegaanka in ay gacan siiyaan maamulka cusub, maalgashina
ku sameeyaan deegaankooda, isagoo dhinaca dawlada ku meelgaarka
ah iyo beesha caalamka ugu baaqay in garab istaagaan dadka
iyo maamulka deegaankaas.
