Dowladda oo lagu eedeeyay
inay qeyb ka tahay dhibaateynta Saxafiyiinta
Ururka Saxafiyiinta Qaranka ee Nusoj ayaa ku eedeeyay
dowladda inay qeyb ka tahay dhibaateynta Wariyaasha magaalada
Muqdisho.
Iyadoo kooxo hubaysan ay shalay ku dhaawaceen Wariye C/qaadir
Cumar Cabdulle Kuwaarel oo ka tirsan TV-ga Universal Xafiiskiisa
Muqdisho ayaa Ururka Saxafayiinta Nusoj waxa uu ku eedeeyay
dowladda in ay qeyb ka tahay dhibaateynta Wariyaasha Muqdisho.
C/rashiid Abuukar Deel oo ka mid ah Mas’uuliyiinta Ururka
ayaa waxa uu sheegay in dowladda KMG Soomaaliya ay sii deysay
dad badan oo loo qabtay dilalkii Wariyaasha sida Xasan Fantastic
iyo Xiis, iyadoo aan wax la iska weydiin dambigooda taasina
ay xadgudub ku tahay Saxaafadda.
Wariye Axmed Nuur oo Tv-ga Universal ay iska shaqeeyaan Wariye
C/qaadir Kuwaarel ayaa waxa uu sheegay in uu ka xun yahay dhaawaca
loo gaystay saxiibkiisa ay isla shaqeynayaan oo uu sheegay in
uu rajeynayo caafimaad isaga oo dhaleeceeyay kooxihii ka dambeeyay
dhaawaca Wariyaha.
Ku dhawaad 10 Wariyayaal ayaa sanadkaani gudihiisa dil iyo dhaawac
loogu gaystay Soomaaliya haba ugu badanaato magaalada Muqdisho
kuwaasi oo aan la ogeyn cida ka dambeysa cida wax ka qabteyna
aysan jirin.
Xaafiiska Wararka Warlalis.com
