Ahlu Sunna oo balan qaad
ka heshay Qaramada Midoobay
Maamulka Ahlu Sunna Waljamaaca ee gobolada dhexe
ayaa sheegay in uu balan qaad ka helay Qaramada Midoobay kadib
markii shalay uu wafdi booqday gobolada dhexe.
Gudoomiye ku xigeenka Golaha fulinta Ahlu Sunna Waljamaaca Sheekh
Axmed Ilka case ayaa waxa uu faah faahin ka bixiyay kulamo ay
shalay la qaateen wafdi ka socday QM oo uu hogaaminayay u qaabilsanaha
QM ee bini’aadanimada Soomaaliya Mark Bowden oo shalay
gaaray magaalada Dhuusamareeb.
Ilka case ayaa waxa uu sheegay in Wafuuda ka socotay Qaramada
Midoobay ay u balan qaadeen inay ka gacan siinayaan Maamulka
sugida amaanka, tababarida ciidamada iyo dib u dhiska xarumaha
Hay’adaha kala duwan ee Maamulka Ahlu Sunna ee gobolada
dhexe.
Gudoomiye ku xigeenka Golaha fulinta Ahlu Sunna Waljamaaca ayaa
waxa uu sheegay in waxyaabaha ugu weyn oo ay ka rajeynayaan
QM inay wax ka qabato inay ka mid tahay inay quudin u sameyso
dadka barakacayaasha ah islamarkaana ay Xarumaheeda ka samaysato
deegaanada ay maamulaan Ahlu Sunna ee bartamaha Soomaaliya.
Booqashada Qaramada Midoobay ee gobolada dhexe
ee dalka ayaa waxa ay imaaneysaa xili Ahlu Sunna ay horay ugu
baaqday QM inay gargaar soo gaarsiiso deegaanada ay ka taliyaan.
Xaafiiska Wararka Warlalis.com
