Musharaxa Madaxweynaha Avv C/raxmaan
C/shakuur oo Kulan la qaatay Bahda Saxaafada
Musharaxa xilka madaxweyne ee Soomaaliya Avv C/raxmaan
C/shakuur Warsame ayaa caawa munaasabad Afur ah u sameeyey suxufiyiinta
ka hawlgala magaalada Muqdisho. Kulanka oo ka dhacay Xarunta
Olalaha Musharaxa ee Muqdisho ayaa waxaa kasoo qaygalay agaasimayaasha
idaacadaha, Taleefishanada iyo suxufiyiinta ka hawlgala qaybaha
kala duwan ee warbaahinta ayaa musharaxu ku dheeratay ahmiyada
saxaafada, xuquuqda saxafiga iyo masuuliyada bahda warbaahinta,
isagoo sheegay in saxaafadu tahay awooda afraad ee dawlada.
Musharaxa ayaa sheegay in ay lagama maarmaan tahay in la helo
saxaafad gutada kaalintii looga baahnaa ee 1- Gudbinta xogta,
2- Wacyigelinta Bulshada iyo 3- Maaweelinta dadwaynaha, isagoo
sheegay in ay laga maarmaan tahay in xogtu ay ku dhisnaato dhexdhexaadnimo,
masuuliyad iyo xaqiiqo.
Wuxuu kaloo musharaxu si kulul u canbaareeyey dilalka, handaada,
cagajuglaynta lagula kaco suxufiga, isagoo dhinaca kale sheegay
in looga baahan yahay suxufiyiinta in ay waajibkooda u gutaana
si masuuliyad qaran ku dheehantahay.
Wuxuu dhinaca kale sheegay in hadii la doorto uu si wayn u ahmiyad
wayn siin doono saxaafada islamarkaana uu mudnaanta koowaad
siin doono meelmarinta sharciga saxaafada, kaasoo ay kawada
shaqeeyaan Bahda Saxaafada, Bulshada Rayadka ah iyo dawlada
intaba.
Musharaxa C/raxmaan C/shakuur ayaa isagu horay uga soo shaqeeyey
qaybo ka mid ah warbaahinta laguna tilmaama inuu yahay nin saxiibtinimo
kala dhaxayso saxaafada.
Xaafiiska Wararka Warlalis.com
