Avv Murashax C/raxmaan
C/shakuur : Waa in Jaamacadii Soomaaliya Dib Loo Furaa .
Avv Murashax C/raxmaan C/shakuur
Xaflad si heersare ah loo soo agaasimay oo uu
ka qaybgalay musharaxa xilka madaxweynenimo ee Soomaaliya Avv
C/raxmaan C/shakuur ayaa lagu qanbtay xarunta Jaamacada Soomaaliya
ee Muqdisho. Xaflan oo shahaadooyin lagu gudoonsiiyey arday
ka qalinjebisay kuliyada Ganacsiha ee Jaamacada Soomaaliya ayuu
Musharaxu ku dheeraaday ahmiyada ay waxbarashadu leedahay iyo
in loo baahanyahay in tayayeeyo tacliinta sare ee dalka.
Musharax ayaa ku amaanay masuuliyiinta iyo ardayda
Jaamacada Soomaaliya dadaal iyo karida dheeriga ah ee ay muujiyeen
sanadihii lasoo dhaafay, taasoo keentay in ay gurtaan mirihii
ay dhibka badan u soo mareen.
"Waan garan karnaa duruufta ay ku shaqaysaan, in macalinkii,
manhajkii, miisaaniyadii, maktabadihii, xarumihii, laababkiiba
iyo weliba amaankii la doonayo in aad idinka uun diyaarisaan,
taasi macnaheedu waa wax walba adigaa lagaa doonayaa in aad
qabato". Wuxuu kaloo musharaxu bogaadiyey jaamacadaha gaarka
loo leeyahay, isagoo sheegay in dawladu ka gaabisay dib u furidii
iyo soo noolayntii Jaamacadii dawlada.
" Waxaa lagama maarmaan ah in Jaamacadii Ummada dib loo
furo lana hawlgeliyo", isagoo sheegay in ay lagama maarmaan
tahay in la magacaabo gudi ka shaqeeya dib u hawlgelintii Jaamacadii
Ummada.
Mar uu la hadlayey Musharaxu ardayda qalin jebinaysa ayuu ku
booriyey in ay waxbarashada sii wataan, isagoo sheegay in sida
keli ee ay kusii wadan karaan ay tahay in aqriska joogteeyaan.
"Mutacalin ma noqon kartid hadii aadan wax aqrin, suuradii
ugu horaysay ee soo degtana waxay ka hadashay wax aqrin".
Wuxuu kaloo Mudane C/shakuur sheegay in waxbarashada nafciga
leh ay tahay tan maskaxda furta, kobcisan garaadka, korna u
qaada wacyiga,
" Waxbarasho waa tii kuu suuragelisa in aad wax naqdi karto,
lafaguri karto, mushkilad xalin karto ee ma ahan in aad wax
uun xifdido kana baxdo".
Musharax ayaa gebgebadii hadalkiisa balan qaaday in uu tacliinta
xooga saari doono, xoogana saari doono horumarinta Falfasafad
waxbarasho oo danta dadka iyo dalka u adeegta.
