 |
|
» Benadir » Bulsho » Cadaado » CeelBuur » Dayniile » Deeyoo » Goobjoog » Hiiraan » Hobyonet » Jamaame » Janaale » Nurudin »
nuuruliimaan » Qaamuus |
Xubno uu horkacayo Raisul wasaaraha ku xigeenka ahna Wasiirka Ganacsiga Mudane Cabdiwahaab Ugaas, Wasiirka Qorsheynta Mudane Goodax iyo xubno kale oo badan oo ka socday golaha wasiiradda Soomaaliya ayaa maanta u tagay odoyaasha Dhaqanka Soomaaliyeed iyaga oo u sheegay inay ka qeyb galaan siminaar Dawladdu iyo Mahiga Doonayaan inay u qabtaan Odoyaasha dhaqanka Soomaaliyeed, sidoo kale waxaa ay odoyaasha ka codsadeen inay si degdeg ah usoo gudbiyaan xubnihii ansixin lahaan Dastuurka muranka badani ka taagan yahay. Afhayeenka odoyaasha Dhaqanka ee shirka uga socdo magaalada Muqdisho Garaad Jaamac ayaa u sheegay xubnaha ka socday dawladda Soomaaliya kahor inta inta aysan soo gudbin xubnaha ansixinta ama diidida Dastuurka inay ka doonayaan dawladda Soomaaliya inay warcad ka siiyaan waxa ay uga tashanayaan Madaxda Dawladda Soomaaliya iyo Xubnaha lagu sheegay saxiixayaasha maadaama ay maalmahaan ka soo baxayeen hadalo is burinaya. Garaad Jaamac oo hadalkiisa sii wata ayaa u sheegay madaxda Dawladda iyo Xafiiska Amb. Mahiga hadaanu nahay odoyaasha dhaqanka Soomaaliyeed waxaad horey noogu sheegteen markaanu iskugu nimid magaalada Muqdisho in taladii umadda Soomaaliyeed ay gacanteena ku jirto nalagana doonayo inaan ka shaqeyno danta umadda Soomaaliyeed, waxaadse haddana gadaal ka sheegteen hadaanu nahay odoyaasha dhaqanka Soomaaliyeed inaanu laheyn go’aan balse aan leenahay oo kaliya talo soo jeedin, soo jeedintaasna aad adinku go’aankaad rabtiin ka qaadanaysiin, marka ay arintu sidaa mareyso waxaan idinka rabnaa laba arin inaad noo kala cadeysiin si aan go’aan uga qaadano. 1- Qodobka Koowaad ayuu ku sheegay in sidii aan horeyba noogu sheegteen uguna balanay hadaanu nahay odoyaasha dhaqanka Soomaaliyeed in aan talada umadda Soomaaliyeed ay gacanteena ku jirto, wixii umadda Soomaaliyeed u dan ahna aan ka shaqeynayno. 2- Qodobka Labaad ayuu ku sheegay inaad doonaysaan inaad Maxlal naga dhigataan oo wixii aad adinku rabtiin odoyaal idiin meel mariya inaan noqono. Garaad Jaamac ayaa u sheegay xubnihii ka socday dawladda iyo Xafiiska Amb. Mahiga in ay Jawaab ka siiyaan labadaas qodob si odoyaasha Dhaqanku go’aan u qaataan. Xubnihii ka socday Dawladda Soomaaliya oo uu hogaaminayey Raisul wasaare Ku xigeenka ahna wasiirka Ganacsiga ayaa u sheegay in aysan arintaas hadda go’aan ka siin Karin oo ay arintaan dib iskula laabanayaan. Madaxdii ka socotay Dawladda oo sii wata hadalkooda ayaa ka codsaday odoyaasha dhaqanka in ay ka qeyb galaan siminaar la rabay in loo qabto odoyaasha dhaqanka, siminaarkaas oo la rabay inuu maanta Bilaawdo. Balse waxaa hadalkii qaatay gudoomiyaha odoyaasha dhaqanka iyo Midnimada Beesha Hawiye isaga oo u sheegay madaxda Dawladda in ay siminaar geli Karin Maanta odoyaasha dhaqankuna uu u socdo shir iyaga u gaar ah, firaaqana aysan haysanin maanta, balse ay Jawaab ka sugayaan Madaxda Dawladda in labada qodob oo odoyaasha dhaqanku weydiiyeen inay Jawaab ka soo siiyaan si degdeg ah si odoyaasha dhaqanka Soomaaliyeed ay go’aan uga qaataan arimaha socda. Marka hadalku uu intaas marayo ayey Madaxdii Dawladda Soomaaliya ka socotay u sheegeen odoyaasha dhaqanka in ay dib isugu laabanayaan qodobada la weydiiyayna ay ku wargelin doonaan Madaxda Dawladda oo haatan qaarkood dibadaha ku maqan yihiin jawaabtana ay si degdeg ah ugu soo celin doonaan. Shirkii ayaa intaasi kusoo gabagaboobay iyadoo aan wax go’aan ah la gaarin. Go’aanka maanta ay qaateen odoyaasha dhaqanka Soomaaliyeed ee shirka uga soconayo Magaalada Muqdisho ayaa ah go’aankii ugu wanaagsanaa ee ay ebid qaataan odoyaasha dhaqanka Soomaaliyeed. Shacabka Soomaaliyeed ayaa waxaa maanta usoo muuqatay in odoyaasha dhaqanka soomaaliyeed oo ay weli ku danbeyso dadnimo, ayna yihiin kuwo aan qaadaneynin in loo yeeriyo wax kasta oo umadda Soomaaliyeed dhibaato u horseedaya. Amb. Mahiga iyo Saxiixayaasha Road mab-ka ayaa
manta waxaa soo foodsaaray caqabadii ugu adkeyd kadib markii
ay si indha la’aan ah horey ugu inkireen Baarlamaankii
Soomaaliyeed horeyna u sheegeen in Odoyaasha dhaqanka Soomaaliyeed
la isku keenayo go’aanka umadda Soomaaliyeedna ay iyagu
leeyihiin, balse odoyaasha dhaqanka Soomaaliyeed ay manta diideen
inay noqdaan dad la marsado wax aysan iyagu ogeyn.
Xaafiiska Wararka Warlalis.com |
