Ugaas Xasan Ugaas Maxamad
iyo Odayaasha Beesha Galgaduud oo Taageeray Musharaxa Avv C/raxmaan
C/shakuur
Munaasabad balaaran oo lagu taageerayey musharaxa
Avv. C/raxmaan C/shakuur Warsame ayaa lagu qabtay magaalada
Guriceel ee Goblka Galgaduud. Munaasabanadan oo lagu qabtay
Guriga Ugaas Xasan Ugaas Maxamad Ugaas Nuur ayaa waxaa kasoo
qaybgalay Odayaasha dhaqanka Deegaanka oo ay ugu magacadheeryihiin,
Nabadoon Jaamaca Bootaan Diini, Nabadoon Cartan Sheekh Doon,
Gudoomiyaha dhaqanka Beesha Cayr, Xaashi Maxamad Kulane (Xaashi
Dhigif), Nabadoon Maxamuud C/lle Warsame (Rogomeey), Nabadoon
Jaamac Cujubeey, Nabadoon Warsame Sabriye Cilmi (Kharafaan),
Nabadoon Ciise Maxamad Lugeey, Nabdoon Cali Maxamad Wardheere
(Cali Dheeh), Nabadoon Maxamad Cumar Warsame, Ganacsato, Haween,
Dhalinyaro iyo xubno metelaya Ahlu Suana Waljamaaca.
Ugaas Xasan oo Munaasabadda furay ayaa sheegay in ay taageersanyihiin
Avv C/raxmaan C/shakuur uuna yahay nin aqoon, karti iyo waxqabda
leh,isagoo ka wakiil ah deegaanka iyo dadkiisa ay Musharaxa
la garab joogaan taageero buuxda oo hill iyo hooba leh.
Nabadoon Cartan Sheekh Doon ayaa isagu dhiniciisa soo dhoweeyey
Musharaxa Avv C/raxmaan C/shakuur isagoo sheegay in Musharaxu
uu guulaysan doono maadaama dadkiisa iyo deegaankiisaba ay taageersanyihiin,
tanina ay tahay bilaw fiican oo rajo iyo yidiidlo leh.
Nabadoon Jaamac Cujubeey ayaa ku dheeraatay taaariikhda Musharaxa
isagoo sheegay in markii ugu danbaysay ee kulmaan ay ahayd xili
uu musharaxu deegaanka ka hirgeliyey mashaariic, caafiimaad,
ceel qodis iyo gargaar bani'aadanimo. Nabadoonka ayaa sheegay
in Musharaxu uu kasoo jeedo dad taariikh ku leh deegaankan iyo
dadkiisa, isagoo sheegay in ay guul u rajaynayaan.
Nabadoon Jaamac Bootaan oo munaasabada ka hadlay ayaa ku dheeraaday
xaalada adag ee maanta Soomaaliya marayso, isagoo sheegay in
Musharaxa Avv C/raxmaan C/shakuur uu yahay nin cod kar ah, si
wayn uga soo muuqday fagaaraaha siyaasadeed ee Soomaliya, magac
iyo maamuusna u soo jiiday.
" Aniga waxaa igu filan in C/raxmaan uu yahay ninkii isagoo
Soomaaliya metelaya uu Jaamacada Carabta hogaanka u qabtay,
waa arrinka Soomaalida iyo Deegaankaba ay ku faanaan"
Nabadoon Rogomeey ayaa isagu sheegay inkastoo Musharaxu uu kasoo
jeedo deegankan, hadana uu ku dhashay gobolka Hiiraan gobolkaasoo
ah mid ay hogaamiyayaasha Soomaaliyeed kasoo baxaan. Nabadoonka
ayaa ku dheeraaday taariikhda musharaxa iyo xiriirka uu deeganka
la leeyahay isagoo guul u rajeeyey.
Munaasabadan oo tii ugu horaysan oo noocoode ah oo lagu qabto
gobolka Galgaduud ayaa Barbaarta Gaashaman iyo haween ku labisan
dharkii Hidaha iyo dhaqanka kusoo bandhigeen suugaan, buraanbur
iyo ciyaaraha hidaha dhaqanka ee kala duwan ayaa gebegebadii
waxaa Duco iyo Dardaaran dheer ka jeediyey Ugaas Xasan Ugaas
Maxamad iyadoo ku dhamaatay guul iyo rayrayn.
Xaafiiska Wararka Warlalis.com
